I jage mitäm Töff über d’Outobahn
Ha z’Kabu dürezogä i mimTämpowahn
Mini Ouge luege g’schtoche gäge Horizont
Wot wüsse was sich tuet a der Radarfront
Ungerwägs mirä Schabe ä Fröid ga z’mache
Im Schnitt mach’i das mit 170 Sache
S’geit zügig vorwärts mirä Nase naa
Jede Hobby-Schumi lö’mer hinger üs la schtaa
I dänke rund um mi heigi aues im Griff
Kei Ahnig hani g’haa vo däm graue Schiff
U dä Bulle wo wie gschtört dür d’Schibe tüe lache
Wüu si vo mir hei chönne äs Video mache
Jetz bini z’Billiet los, i bi z’Billiet los…
Scho wieder z’Billiet los… jetz bini’s los…
Der Päscu het dänkt, är houi ufä Putz
Är schabet siner Pnöö am Rubigeschtutz
Ersch we sini Kwawa us der Röhre schreit
De heig’ är d’Wöhli het är mir ämau g’seit
Äs chan’ ihm ufäm Grädu nid schnäu g’nue gaa
Drum het är dr Gring hinger d’Schibe abe g’haa
Im Gebüsch het bereits der Sheriff g’wartet
U dummerwiis grad denn z’rote Blitzli g’schtartet
Am Wuchenändi isch de scho dr Aaruef cho
Mit 42 z’viu heigä sie’nä g’noo
Das längi für’nä Monat lang sis Läbe z’richte
Uf d’Freiheit uf zwöi Räder müess är verzichte
Jetz isch är z’Billiet los, är isch z’Billiet los…
Scho wieder z’Billiet los…är isch’äs los…
Ou dr Hene het’s mit si’närä Ducati erläbt
Won’är sich ämau z’fescht am Guidon het g’häbt
Dr Maa in Uniform het ihm kei Chance g’laa
U g’seit dä Töff, dä lö’mer de grad hie la schtaa
Jetz isch är z’Billiet los, är isch z’Billiet los…
Scho wieder z’Billiet los…är isch’äs los…
