Chrank

I loufe dür d’Gägend uf dr Suechi nach Friede
Mis Härz het z’Verlange nach ä chli Gfüeu
Im Park gseni äs Pärli im Gras näb’enang liege
U d’Sunne schiint nümme, drum wird’s jetze chüeu
D’Familie isch bim z’Nacht, dr Vater tuet bätte
Är danket am Herrgott für z’Ässe am Tisch
Angeri wäre froh, we si äs warms Bett hätte
S’isch ungloublech hert, we’me nümm beschäftiget isch

Aues was hie ablouft, für das si’mer säuber t’Schuld
Mir üebe gärn mit Macht, hei z’Vermöge uf dr Bank
Dä Drittwäutländer nimmt mä Eduschtei u Goud
U plötzlech nimmt üs wunger: warum si’mer aui chrank

D’ Wäut isch nümme gliich sit’äm 11. Septämber
Aues het nöii Dimänsione aa g’noo
Äs Flugzüg cha hüt aus Bombe bruucht wärde
Us so’mänä Inferno chunnt kene drvo
Was isch es ou, was d’Mönsche änang so macht z’hasse
Wäm wei mir de no mau äs Vorbiud sii ?
Aus Tötigsgrund längt haut scho än angeri Rasse
U z’vordersch im Chrieg si chliini Ching drby

Kene würdi naa gä, dr Gring git ihm’s nid zue
Si schlö mit ihrne Waffe, aues churz u chly
U we’s mau nid um Öu geit, de luegt mä eifach zue
Predige tüe’si Wasser aber suufe tüüre Wy

Wett wüsse was Dä dänkt, wo aues mau het g’macht
Wenn Är z’letschte Schtündli für üs lat la schla
Ob Är de no mit Fröid zu üs abe lacht
Oder d’Chrieger uf de Ross uf d’Mönschheit los tuet la
Kene cha’sech drücke und d’Schuld am angere gä
D’Charte liege offe, d’Rolle si längscht verteilt
Jede wird versueche, Schutz i dä Bärge ii’z’nää
Mer chöi nume no hoffe, dass äs de nid z’lang geit

Hätte mir doch viu früecher a üsi Zuekunft dänkt
De müesste mer üs nid sorge, ob’s überhoupt witer geit
Wäre mir nid so schtouz gsi, hätte mer dr Gring chli g’sänkt
Viellich wär jetz aues angers, so liecht isch das hie g’seit